Coutel nous fet sanz alemele,
Qui porte manche sanz cotele ;
De ses braz nous fet aparance,
Sor le cors n’a point de substance.
Rectorique li vait aidant,
Qui a les deniers en plaidant.
Autentique, Qode, Digeste
Li fet les chaudiaus por sa teste ;
Quar ele a tant d’avocatiaus
Qui de lor langues font batiaus[1]
Por avoir l’avoir aus vilains,
Que toz li païs en est plains.
Uns des garçons dame Logique
Fu envoiez à Gramatique :
Lettres portoit por la pès fère ;
Mès de ce ne me puis pas tère,
Que quant il vint à la meson
Qu’il n’entendi pas la reson
Des présenz ne des prétériz,
Là où il ot esté norriz ;
Que poi i avoit demoré :
N’avoit pas bien assés oré
Conjugacions anormales
Qui à décliner sont moult males,
Averbes et pars d’oroisons,
Articles et déclinoisons,
Et genres et nominatis,
Et supins et impératis,
C’à ses figures, formoisons
Singulers, plurers, .m. resons,
Qu’en la cort Gramaire a plus d’angles
Qu’il n’a en Logique de jangles.
Li gars n’en sot venir à chief :
Si s’en revint à grant meschief ;
Mès Logique le conforta,
En sa haute tor l’en porta.
- ↑ Ms. 1830. Var. Chaudeax.
