s’il vos plaisoit à venir en nostre tierre, bien soiiés-vous venus ; et nos vous ferons senescal de nostre court. Et sachiez pour voir que nous avons la plus haute couroune et la plus riche terre qui soit en tout le monde ; si com d’or et d’argent, et de boines pierres précieuses, et de fors fermetés, de fors castiaus, de fors chités ; et sachiés bien que .lxij. roi sont desous nostre poestet et desous nostre couroune, ki tout sont boin crestiien en la loi Jhésu-Christ nostre Père establi. Et si avons autres rois ki ne sont pas crestiien ; mais il sont bien à nostre coumandement. Li povre ki sont en nostre terre, soient estranghe soient frarin, nous les soustenons de nos aumousnes pour l’amour de Dieu ; si qu’il ont assés pour leur vivre. Et sachiés veraiement que nous avons voé à vissiter et à rescourre le sépucre nostre Signour ki est en Jhérusalem au plustost que nous porons, et toute la tiere de promission, se Dieu plest, où Dieux rechut mort et passion pour nous gieter des painnes d’enfier. Et sachiés que nous irons couronneément, à grant ost et à grant compagnie de barons, pour aourer la sainte vraie crois Jhésu-Crist. Et sachiés veraiernent que nous essaucherons la sainte loi de Dieu et des crestiiens, et destruirons la loi des anemis Jhésu-Crist. Et si vous faissons asavoir qu’en nostre partie sont .iij. Indes : Ynde menour, Ynde moiiene, Ynde majour, ù li cors mon signour sains Thomas repose ; et en celle-là sonmes-nous demorant ; et si est devisée des autres Indes par deviers oriant.
Apriès trueve-on Babilone le désierte, de la tour ki est apielée la tour de Babiel, et l’autre partie d’Inde siet au lès par deviers septentrion. Plentieuse est de pain et de char et de vin, et de toutes viandes c’on puet deviser pour cors d’oume aaissier ; et si est nostre lighe ; et
