ruissiaus ki keurent par les contrées d’Inde, et les gens de la contrée i truevent plusieurs pierres précieuses, si comme esmeraudes, safirs, jaspes, calidoine, cassidoines, carboucles, onicles, topasses, rubins, jacintes, grisolites, béricles, sardines, et moult d’autres pierres de grant bonté. Si sachiés veraiement, selonc nostre palais croist une huerbe c’on apiele parmanable : ki c’onques porte la rachine sour soi, il puet kacier le diable, et faire véoir, et parler et dire quanqu’il vieut demander ; et pour ce n’i ose li diables habiter[1]. Si vos faissons asavoir que nous avons une tierre ù croist li poivres, et si le kiout-on cescun an ; et toute la tierre ù li poivres est est plainne de sierpens ; mais quant li poivres est meurs sour les arbres, ki sont dru et espès et bien ramé et bien karchié, adont i maitent li païsant dou païs le fu, et li bois art, et li poivres ciet à tierre ; et li sierpent s’esconsent, ki s’enfuient devant le fu ; mais cil ki ardent le bois environ les ocient. En tel manière sont deguastet li sierpent, et quant li fus est estains, si portent fourques et rastiaus, et font grans monciaus de poivre ; puis les ventielent au vent ; et puis le quissent en oile pour oster le venin des serpens. Et cil bois si est entour .i. haut mont ki est apielés Olimpus, et de cel haut mont naist une fontainne ki samble, quant on le boit, destempremens de toutes les boines hierbes et de toutes les boines espisses dou monde ; et ki le boit il ne sent enfermeté nule dedens .xxx. ans, s’il tant puet vivre ; et en ces fontainnes a pierres ki sont apielées nidionces, et li aigle les portent en leur nis pour comforter les ieux à leur pouchins ; et
- ↑ Voyez, pour certaines vertus des pierres, 1er volume, page 252 note 3.
