Page:Rutebeuf - Oeuvres complètes, recueillies par Jubinal, tome II, 1839.djvu/475

468

ADDITIONS.

qu’il en ont éu nostre congié ; et .xx. chevalier le gardent de jour et .xxx. de nuit. Et saciés qu’en tous les mois de l’an siervent .iij. roi à nostre table dou sierviche ki leur est coumandé, et .xxxij. que dus que contes, sans les François ki cascun jour siervent à nostre table ; et li siergant ki i siervent sont bien armé. Et sachiés bien pour voir que nous avons .ij. mile François que nous avons fais chevaliers ; et cil gardent nostre cors et nostre cambre ; et tout li François ki vienent à nous, soient clerc ou cevalier, nous les ordenons à ordene de cevalerie, pour çou que il sont bien en la foi et en la créance de Jésus-Christ, et portent bien leur armes, et cevaucent bien et biel, et sont boin arbalestrier, et hardit en bataille et loial dedens castiaus ; et quant nous alons en batalle, li François vont entour nous pour garder nostre cors. Et saciés que en nostre court a gent de toutes tierres, et nous font asavoir la manière de leur païs ; et li François nous dient boines nouvieles de l’pape de Roume, nostre ami et nostre frère en Jhésu-Crist. Tout li roi et li conte et li franc cevalier manguent à nostre table tout par ordene. Et saciés, quant uns dus u uns rois u uns contes muert sans hoir, nous donnons sa tierre à .i. des François ki gardent nostre tierre, nostre cambre et nostre cors. Et dalès nous manguent .xij. arcevesque par ordre à diestre, et .x. évesque à seniestre, et li doi patriacle de saint Thumas ki menguent od nous. Nous avons tant abbés com il a jours en l’an, et vij. plus ; et cascuns de ces abbés cante cascun jour en notre kapiele une fois, et quant il a visité, il s’en reva célébrer ses frères en s’abéie. Et sachiés que je sui apielés Priestres-Jehans pour çou que je doi avoir humilité coume priestres, et pour çou que priestres est le plus haute piersonne ki soit, que Jhésu-Cris fu priestres et