DE LA MORT LARGUECE.
Tout ne face mentir que fable,
Si est mentir souvent aüable,
Car mentir aucune seson
Done bien color à reson.
Or souffrez .i. poi que je conte
Por qoi commenz ainsi cest conte :
Il avint que l’autr’ier erroie
Vers Feschamp, si com miex pooie.
Tant errai c’un matin aving
A la vile, et quant je là ving,
Chiés Richart du Pont pris ostel.
Diex le gart, quar il a los tel
C’oste ne puet meillor avoir.
Assez tost je vous faz savoir
Alai à Bauduin ès Bours
Tout à pié, quar à Chières-Bours
Grant pieçà, por .i. grant malage,
I vouai le pélerinage.
S’alai aquiter ma pramesse ;
Tout à point i ving à la messe :
M’offrande fis quant fu chantée.
Lors fu itele ma penssée,
Por ce qu’adont estoit jéune
De rouvoisons haute et commune,
Dusqu’à none jouer m’iroie.
Sus la faloise pris ma voie :
Vers le saut Wautier tant musai
Que grant pose du jour usai.
Sommeil me prist : sus la marine
