Page:Rutebeuf - Oeuvres complètes, recueillies par Jubinal, tome II, 1839.djvu/483

476

ADDITIONS.

Merdes sont cels qui t’obéissent
Et qui ton voloir accomplissent.
Ta gent vit toz jors en envie ;
Jhésu-Crist toi et els maudie ! »
Quant tout ce li ot dit Larguesce,
Avarisce vers li s’eslesse,
Qui fu forte et plaine de rage ;
Du poing li done en son visage
Si grant cop comme el pot doner.
Adonc me voil abandoner
D’aidier li de toute ma force ;
Mès Avarisce si s’esforce
Quant je l’embrachai por abatre,
Jus m’esqueut ; lors m’en prent à batre
Des piez et des poins par trestout.
Trop par est son pooir estout
Et rade et fort à grant merveille.
A sa force ne s’apareille
Nule chose, je croi, ou monde.
Je pri à Dieu qu’il la confonde,
Que tant me foula et bati
Que tout mon pooir abati.
Comment que je santé recueille,
N’ert jamès jor que ne m’en dueille.
Larguesce toute sa puissance
Mist à fère moi aïdance,
Mès ne por quant, chascuns le sache,
Mort cuida que fusse en la place.
Adonc corut Larguesce seure :
Par les flans restreint si en l’eure
Qu’enverse l’abat en la prée.
Tost fu faillie la meslée
Que ne li poi de rien aidier.
Tantost li toli le plaidier ;
Souz le menton li cerche l’angle,
Aus poins l’estrainst si qu’il l’estrangle ;
Et quant el l’ot morte estranglée,
Sus son col amont l’a ruée.