Feme a le cuer félon, chétis et orgueilleux,
Cruel et desloial, félon et traïteux.
Feme est de tel nature, ice vos di sanz faille,
Quant l’en li desdit rien, lors convient qu’à nus faille.
Por chose que il done ne por chose qu’il vaille,
Puisqu’il faut as deniers, ne li chaut quel part aille.
Honiz est qui à feme son affaire descuevre,
Mais l’ome qui est sages toz jors vers lui se cuevre ;
Quar à feme ne chaut que les janbes li oevre :
Tote jor vorroit feme que l’en li fust sor l’uevre.
Feme prent le musart à la gluz et à l’eim ;
Feme fait mult de tors, mult est de mal pelein ;
Feme prent tot à chois ou cortois ou vilain,
Borgois ou chevalier, mais qu’il emple la mein.
Por ce dist que cortois et comme saige maistre,
Com cil qui bien savoit lor couvine et lor estre,
Feme qui bien se velt vestir, chaucier et paistre,
N’iert jà saoule d’ome, lasse en puet-el estre.
La manière por quoi feme set mult promestre
S’amor, c’est par baisier, si com nos dit la letre ;
Quar maintenant se puet dedenz ses limons metre
Celui qui feme baise, s’il s’en velt entremetre.
Feme est plus escoulant que n’est darset en Loire ;
Feme si bel por mains que le trox d’une poire ;
Quar celui que l’en cuide qu’ele het de mort noire
Cil aime-ele d’amors, si en fait mains acroire.
Feme se pare et tiffe, ce voit-l’en mult sovent,
Et vest sa bele robe, et chauche estroitement,
Que mult tost fait .i. home, se il la croit, dolent :
Tant prent de lui qu’il fait la chose par quoi pent.
Page:Rutebeuf - Oeuvres complètes, recueillies par Jubinal, tome II, 1839.djvu/493
Le texte de cette page a été corrigé et est conforme au fac-similé.
486
ADDITIONS.
