Feme a muant coraige : or pleure, or fait .i. ris ;
Ses elz a à plorer trestoz duiz et apris.
Cil est fox et chétis qui lez feme s’acoste :
Dieu set à musart rère le lart desus la coste ;
Et si vos di qu’il est herbegiez chiés tel hoste
Dont il giete sa beste à reculons et oste.
Fox est qui chiés tel oste herberge ne demeure
Quant l’ostesse ne l’aime, ne prise ne henneure,
Et si le compère chièrement en pou d’eure ;
Quar tel n’a que .i. oeil qui tenrement en pleure.
De la folie as femes me merveil-ge souvent :
Feme est plus orgueilleuse que lions ne serpent ;
Par feme somes-nos trestuit mis à torment,
Feme nos gita fors du disne firmament.
Ne l’ sont pas totes celes, ne il n’est pas mestiers ;
Ainz en i a qui ont cuers loiax et entiers,
Et servent lor seignors de gré et volantiers,
Et dient patre-nostres, set seaumes et sautiers.
Or prion Jésu-Crist, qui fist et terre et mer,
Que des mains au déable nos vueille délivrer,
Et à ces pécheresses si lors péchiez plorer
Qu’il puissent de lassus la joie recouvrer.
Diex quita par les lermes Marie Mazaleine
Quant el lava ses piez, ce est chose certaine.
Nus n’aura jà pardon se il n’en sueffre paine,
Ne plus que l’en puet faire escarlate sanz graine.
Mais itant vos vueil dire en la fin de mon conte,
Vos qui savez qu’est bien ne que à hennor monte,
Si comme ge le trueve et com l’en le me conte,
Qui plus est que honiz qui à feme fait honte.
Page:Rutebeuf - Oeuvres complètes, recueillies par Jubinal, tome II, 1839.djvu/495
Le texte de cette page a été corrigé et est conforme au fac-similé.
488
ADDITIONS.
