Pourquoy as-tu rompu mon petunoir, tu 228|| vois bien que ie n’en ay point d’autre ? Et Dieu en prit vn qu’il auoit et le luy donna, luy disant : En voilà vn que ie te donne, porte-le à ton grand Sagamo, qu’il le garde, et s’il le garde bien, il ne manquera point de chose quelconque, ny tous ses compagnons. Cet homme prit le petunoir qu’il donna à son grand Sagamo, et durant tout le temps qu’il l’eut, les Sauuages ne manquerent de rien du monde : mais que du depuis ledit Sagamo auoit perdu ce petunoir, qui est l’occasion de la grande famine qu’ils ont quelques-fois parmy-eux. Voylà pourquoy ils disent que Dieu n’est pas trop bon, et ils ont raison, puisque ce Demon qui leur apparoist en guise d’vn Dieu, est vn esprit de malice, qui ne s’estudie qu’à leur ruyne et perdition.
La croyance en general de nos Hurons (bien que très mal entendue par eux-mesmes, et en parlent fort diuersement ;) c’est que le Createur qui a faict tout ce monde, s’appelle Yoscaha, et en Canadien Ataouacan, lequel a encore sa Mere-grand’, nommée Ataensiq : leur dire qu’il n’y a point d’apparence qu’vn Dieu aye vne Mere grand’, et que cela se contrarie, ils demeurent sans replique, comme 229|| à tout le reste. Ils disent qu’ils demeurent fort loin, n’en ayans neantmoins autre marque ou preuue, que le recit qu’ils alleguent leur en auoir esté fait par vn Attiuoindaron, qui leur a faict croire l’auoir veu, et la marque de ses pieds imprimée sur vne roche au bord d’vne riuiere, et que sa maison ou cabane est faicte comme les leurs, y ayant abondance de bled, et de toute autre chose necessaire à l’entretien de la vie humaine.
