de logis est au milieu de la court, comme vn donjon, puis les courtines et rempars faicts de bois, auec quatre petits bastions faicts de mesme aux quatre coins, esleuez enuiron de douze à quinze pieds du raiz de terre, sur lequel on a dressé et accommodé des petits iardins, puis la grand’porte auec vne tour quarrée au dessus faicte de pierre, laquelle nous sert de Chapelle, et vn beau fossé 57|| naturel, qui circuit tout l’alentour de la maison et du iardin qui est ioignant, avec le reste de l’enclos, qui contient quelques six ou sept arpens de terre, ou plus à mon aduis. Les Framboisiers qui sont là és enuirons, y attirent tant de Tourterelles (en la saison) que c’est vn plaisir d’y en voir des arbres tous couuerts, aussi les François de l’habitation y vont souuent tirer, comme au meilleur endroict et moins penible. Que si nos Religieux veulent aller à Kebec, ou ceux de Kebec venir chez nous, il y a à choisir de chemin, par terre ou par eau, selon le temps et la saison, qui n’est pas vne petite commodité de laquelle les Sauuages se seruent aussi pour nous venir voir, et s’instruire auec nous du chemin du Ciel, et de la cognoissance d’vn Dieu faict homme, qu’ils ont ignoré iusques à present. On tient que ce lieu de Kebec est par les 46. degrez et demy plus sud que Paris, de prés de deux degrez, et neantmoins l’Hyver y est plus long et le pays plus froid, tant à cause d’vn vent de Nor-ouest qui y ameine ces furieuses froidures quand il donne, que pour n’estre pas le pays encore gueres habité et deserté, et ce par la 58|| negligence et peu d’affection des Marchans qui se sont contentez iusques à present d’en tirer les pelleteries et le profit, sans y auoir voulu employer aucune despense, pour
