et les excellentes, comme il est excellent en jugement et à congnoistre le prix et la valeur de toutes choses. Encore ce petit destour, ou passe-temps de plaisir, luy est comme un exercice de vertu, dont il use le plus souvent, au lieu de la chasse et de la venerie, sans laisser, parmy ses esbats, de reconnoistre les advenues de son armée, de remarquer l’assiette des villes et places où il passe, la nature des personnes qu’il rencontre, des lieux et contrées qu’il traverse, et curieusement apprend les passages et guez des riviéres, et retient les distances des villes et bourgades ; marque en quels endroits il seroit commode de camper son armée, quand elle y passeroit, et tousjours s’enquiert et apprend quelque chose du faict de ses ennemis, n’ayant jamais entrepris de tels voyages qu’il n’ait eu en main une ou deux entreprises sur quelques places rebelles. Mais il auroit beau estre continent, sage, tempéré, morne et grave, et retiré, vous y trouveriez tousjours que redire. Quand on s’est mis une fois à haïr un homme, on interprete en mauvais sens tout ce qu’il faict. Il auroit beau s’abstenir de tous plaisirs, et ne faire que prier Dieu et donner l’ausmone, vous diriez que ce seroit feinte ou hypocrisie. S’il est permis de juger ainsy des actions d’autruy, contre la deffense expresse que Dieu en a faict, pourquoy ne me sera -
