ils n’auroient pas lieu de rien aprehender pour la Reine de la Suſiane, ny pour la Princeſſe Araminthe. Comme Abradate eſt plus violent que le Roy de Pont, il parla plus ferme à Creſus : luy diſant qu’il voyoit bien qu’il s’eſtoit abuſe, ayant creû que s’il luy de mandoit le Prince Artamas, afin de vous propoſer d’en faire un eſchange avec la Reine ſa Femme, il ne luy refuſeroit point : & que bien loin de cela, il ne vouloit pas ſeulement demeurer dans les loix ordinaires de la guerre. Adjouſtant encore beaucoup d’autres choſes, auſquelles Creſus reſpondit ſi durement, que je ſuis le plus trompé de tous les hommes, ſi Abradate n’a quelque aigreur dans le cœur contre luy. Car lors que je fus prendre ſa reſponce, je luy entendis raconter la choſe, parlant à de my bas à un de ſes Amis, d’une maniere qui me le fit aſſez connoiſtre. Cependant le Roy de Pont & luy, firent pourtant à la fin reſoudre Creſus à ce qu’ils ſouhaitoient : de ſorte que j’eus ma reſponce, telle que je la pouvois deſirer. En prenant congé d’Abradate, il me chargea d’une Lettre pour la Reine ſa Femme : & m’ordonna de vous dire, que s’il euſt eſte Maiſtre abſolu de la choſe, il n’auroit pas ſeulement protegé Artamas, mais qu’il l’auroit delivré : adjouſtant à cela une chaine d’or avec une Medaille, où eſt le Portrait de Panthée, qu’il me pria de prendre : afin, diſoit il, de me pouvoir ſouvenir de vous dire qu’il y avoit un homme parmy vos ennemis, qui mouroit d’envie de pouvoir avec honneur eſtre voſtre Amy. Seigneur, luy dis-je alors, vous me diſpenserez s’il vous plaiſt de recevoir un preſent ſi magnifique, qu’il pourroit me rendre ſuspect au Prince que je ſers : comme ſon merite, reprit il, a des chaines plus fortes à vous attacher à luy, que
