Mazare avoit veſcu à Sardis : il ſe ſouvenoit qu’il n’avoit point voulu aller voir Mandane, quand il l’en avoit preſſé & en comprenoit alors la raiſon. Il penſoit qu’il avoit fait amitié avec le Gouverneur de la Citadelle, & avec tous les gens de qualité de la Cour : & il voyoit enfin qu’il faloit que Mazare euſt un deſſein. Mais ne le pouvant comprendre, & voulant en eſtre eſclaircy ſans differer davantage, il s’approcha du Roy de la Suſiane & du Prince Mazare, & regardant mon Maiſtre ; de grace, luy dit il, tout mon Rival que vous eſtes, ne me refuſez pas une faveur que je vous demande, comme ſi vous eſtiez encore Telephane, de qui j’eſtois Amy, & Amy paſſionné, il n’y a pas un quart d’heure. Bien que je ſois voſtre Rival, reprit le Prince des Saces, & que par conſequent Telephane n’ait jamais pû eſtre fort de vos Amis, non plus que Mazare, je ne laiſſe pas de vous dire, qu’il n’y a qu’un tres petit nombre de choſes que vous ne puiſſiez pas obtenir de moy : car enfin apres avoir ſauvé la vie à la Princeſſe Mandane, que j’avois fait perir malheureuſement, vos prieres me doivent eſtre fort conſiderables, & me le ſeront en effet touſjours. Cela eſtant, repliqua le Roy de Pont, dittes moy un peu ce que je dois penſer de vous : car je vous avoüe que je n’en sçay rien. Quand je me ſouviens, pourſuivit il, de tout ce que je vous ay veû faire, je ne sçay plus où j’en ſuis : & je doute encore ſi vous eſtes Telephane, ou ſi vous eſtes le Prince Mazare. je ſuis ſans doute le dernier, reprit il : mais puis que cela eſt, adjouſta le Roy de Pont, comment vous elles vous venu jetter dans le Party de Creſus ; pourquoy avez vous caché voſtre Nom ; & par quel motif avez vous agi comme vous avez fait ? eſt ce pour vous ou pour
