on rendoit à Hermogene, & faire voir les raretez de la Ville à Beleſis : en ſuitte dequoy, il demanda à Hermogene quand il vouloit le mener chez Cleodore ? car encore, dit il, que je ne sçache pas tout ce qu’il faut sçavoir pour la divertir, je ne laiſſe pas d’avoir beaucoup d’envie de la viſiter. A l’inſtant meſme Hermogene envoya demander ſi Cleodore eſtoit chez elle : mais on luy vint dire qu’il n’y avoit qu’une heure qu’elle eſtoit partie pour aller aux champs, & qu’elle n’en reviendroit de quinze jours. Comme j’ay deſſein de paſſer trois mois icy, reprit Beleſis, il faut pour me conſoler, que je penſe que du moins ce n’eſt qu’un plaiſir differé, & non pas un plaiſir perdu : pendant cette petite abſence de Cleodore, Hermogene fit voir à Beleſis toutes les belles, & de là Cour, & de la Ville, ſans que ſon cœur en fuſt touché : & comme il a un eſprit adroit, il s’aquit tous les Amis d’Hermogene en fort peu de jours, & sçeut auſſi bien les divers intereſts de toute noſtre Cour, que s’il y euſt eſté toute ſa vie. Mais enfin quinze jours apres ton départ, la belle Cleodore revint : le hazard voulut meſme que Beleſis, Hermogene, & moy, qui venions de nous promener, la viſmes revenir, & la ſalüaſmes : de ſorte que sçachant ſon retour auparavant que perſonne le sçeuſt, nous y fuſmes des premiers : car comme elle eſtoit arrivée d’aſſez bonne heure, nous luy fiſmes noſtre viſite ſans choquer la bien — ſeance : apres luy avoir toutefois donné autant de temps qu’il luy en faloit pour conſulter ſon Miroir, afin de voir ſi elle eſtoit en eſtat de recevoir compagnie. Comme nous fuſmes donc chez elle, Hermogene preſenta Beleſis à ſa Tante & à elle auſſi : & pour faire la civilité toute entiere à ſon Amy, il ſe mit à entretenir la premiere :
