remarquer toutes les beautez : le reſte de la compagnie les ſuivant, & ſe meſlant meſme à leur converſation. D’abord Cleodore le mena par une grande Allée de Cypres, au bout de la quelle eſtoit une Fontaine, dont les eaux en s’eſluant par gros boüillons les uns ſur les autres, faiſoient continuellement voir un grand Rocher de Criſtal, à qui les rayons du Soleil donnoient les couleurs de l’Arcen-Ciel. De là tournant à droit, de l’autre coſté d’une eſpaiſſe Paliſſade, le long de laquelle coule un petit ruiſſeau ; Cleodore fit voir à Beleſis un grand Parterre, au de là duquel, par deſſus une Baluſtrade qui le bornoit, on voyoit une agreable Prairie : & au delà de la Prairie, la meſme Riviere qui paſſe à Suſe. Apres avoir donc eſté juſques à cette Baluſtrade, & veû en paſſant un grand Rondeau au milieu du Parterre, nous tournaſmes à gauche : pour luy aller faire voir un grand Canal, qui borne le Jardin d’un coſté. En ſuitte Cleodore mena Beleſis voir un Parterre d’eau admirable, qui eſt encore en ce lieu là : apres quoy nous fuſmes nous aſſoir dans un grand Cabinet de Mirthe où il y a vintquatre Statuës dans des Niches de verdure. Au milieu de ce Cabinet, il y a une Fontaine, dont les eaux ſont jettées par douze Monſtres Marins, que l’on ne voit qu’à demy corps : la Figure du milieu eſtant un Neptune avec ſon Trident. Comme ce Cabinet eſt fort agreable, & qu’il y a des ſieges tout à l’entour, nous y fuſmes aſſez long temps : Cleodore faiſant touſjours la guerre à Beleſis, & voulant luy perſuader qu’il n’y avoit rien de tout ce qu’il voyoit en ſon Païs : luy nommant juſques aux herbes les plus un univerſellement connuës : & faiſant enfin ſi bien, que d’une converſation de bagatelles, elle en divertiſſoit toute une grande compagnie. Beleſis de ſon coſté,
