pas eu quelque ſorte de compaſſion de Beleſis, elle ne ſe ſeroit pas privée de ſa converſation : & ſe ſeroit contentée de le prier de regler l’affection qu’il diſoit avoir pour elle. Hermogene entendant parler Cleodore avec toute la douceur que peut avoir une Perſonne qui en bannit une autre, ſans la vouloir deſobliger abſolument, creût effectivement que ſi elle sçavoit l’inconſtance de Beleſis, il pourroit peut-eſtre occuper la place que cét inconſtant occupoit dans le cœur de cette belle Perſonne : de ſorte qu’emporté par l’excés de ſon amour, & voyant qu’il faloit ou quitter Cleodore, ou taſcher de la détromper de la croyance où elle eſtoit, d’eſtre touſjours aimée de Beleſis, afin de faire changer ſon Arreſt dé mort : il ſe mit à agiter la choſe en luy meſme. Comme il avoit touſjours extrémement aimé Beleſis, il eut quelque peine à ſe reſoudre de dire ce qu’il sçavoit bien qu’il ne vouloit pas qu’il diſt : mais apres tout, s’agiſſant de toute la felicité de ſa vie, l’amour l’emporta ſur l’amitié : & d’autant plus, qu’il avoit l’eſprit fort aigry contre Beleſis. Pendant qu’Hermogene ſongeoit donc à ce qu’il ſeroit, Cleodore le regardoit : croyant que tous les divers changemens qu’elle voyoit en ſon viſage, n’eſtoient cauſez que par la douleur qu’il avoit d’eſtre contraint de ne luy parler plus comme à l’ordinaire. Mais à la fin Hermogene faiſant un grand effort ſur luy meſme, les Dieux me ſont teſmoins. Madame, luy dit il, ſi je n’ay pas une repugnance extréme à chercher quelque remede aux maux que je ſouffre, en vous aprenant une choſe qui vous affligera ſans doute : & qui ne me sçauroit eſtre agreable. Car enfin je ſens bien que je ne pourray voir dans vos beaux yeux, la melancolie que vous aurez d’aprendre que Beleſis n’eſt
