inutilement : & nous nous deparaſmes ſans avoir rien avancé ny rien conclu. Et certes il fut avantageux que Beleſis ne logeaſt plus chez Hermogene, comme il y avoit logé au commencement qu’il fut à Suſe ; car ils ſe ſeroient encore broüillez plus fort qu’ils ne firent.
Cependant le pauvre Hermogene ſe trouva eſtrangement embarraſſé : parce que Cleodore remarquant toutes les inquietudes de Beleſis, & croyant qu’il ſouffroit infiniment pour l’amour d’elle, avoit une envie extréme de pouvoir bannir Hermogene : ſi bien que le ſixieſme jour qu’elle luy avoit accordé ne fut pas plus toſt expiré, qu’elle ſe prepara à luy donner cette heure d’audiance qu’il luy avoit demandée, & qu’elle luy avoit promiſe. De ſorte qu’en faiſant naiſtre l’occaſion adroitement dans la Chambre de ſa Tante, ils ſe trouverent tous deux vers des feneſtres aſſez eſloignées du reſte de la Compagnie, pour pouvoir parler ſans eſtre entendus. C’eſt pourquoy Cleodore prenant la parole, ſe mit à le conjurer de commencer de ne luy parler dus avec tant d’attachement : & de ſe deſacouſtumer peu à peu d’aller chez elle. Du moins Madame, luy dit il, avoüez moy en me banniſſant, que c’eſt pour Beleſis que vous me banniſſez : & que ſi Beleſis n’eſtoit point amoureux de vous, vous ne me banniriez point. Cleodore croyant qu’en effet Hermogene la laiſſeroit pluſtoſt en repos ſi elle luy parloit ſincerement, que ſi elle luy déguiſoit une verité qu’il n’ignoroit pas ; luy dit à la fin avec des paroles aſſez obligeantes, qu’il eſtoit vray qu’elle ne ſeroit pas marrie d’oſter à Beleſis tout ſujet de faire eſclatter ſa jalouſie : & de ſe pleindre d’elle à des gens qui pourroient en tirer des conſequences qui ne luy ſeroient pas avantageuſes : l’aſſurant que ſi elle n’euſt
