n’épargnoit pas meſme Hermogene. Il n’avoit pourtant pas de preuves convainquantes contre luy : au contraire, il penſoit que le Portrait de Leoniſe eſtoit ce qui avoit fait deſcouvrir la verité à Cleodore, qui de ſon coſté n’eſtoit pas ſans inquietude.
Le deſir de ſe vanger, occupoit pourtant ſi fort ſon ame, qu’elle ne ſentoit preſques pas la perte de Beleſis : auſſi fut-ce par ce ſentiment là, qu’elle reçeut Hermogene avec une civilité extraordinaire, pendant que Beleſis eſtoit aveque Leoniſe. D’abord qu’elle le vit, elle le remercia de luy avoir fait deſcouvrir la fourbe de ſon Amy : elle l’apella ſon Liberateur ; & luy dit enfin tant de choſes obligeantes, que s’il euſt eu moins d’eſprit qu’il n’en avoit, & qu’il euſt eſte moins amoureux qu’il n’eſtoit, il s’en ſeroit tenu fort obligé. Mais parce que tout ce que Cleodore luy diſoit, eſtoit une marque de l’affection qu’elle avoit pour Beleſis, quoy qu’elle paruſt fort irritée contre luy, il ne s’en pouvoit reſjouir. Neantmoins elle luy dit tant de fois qu’elle n’oublieroit jamais le ſervice qu’il luy avoit rendu, qu’à la fin il eſpera qu’il pourroit tirer quelque avantage de ce qu’il luy avoit deſcouvert l’inconſtance de ſon Amy : mais comme il luy voyoit l’eſprit fort agité, il n’oſoit preſques la preſſer de luy donner dans ſon cœur la place que Beleſis meritoit de perdre : & il eſcoutoit toutes les exagerations qu’elle lay faiſoit de la perfidie de Beleſis, ſans luy parler de ſa paſſion que des yeux ſeulement. Apres qu’elle luy eut donc raconté comment elle avoit eu le Portrait de Leoniſe & le ſien, & qu’elle luy eut apris tout ce qu’elle avoit dit à Beleſis, mais Hermogene, adjouſta t’elle, ce n’eſt pas aſſez de m’avoir revelé ſon crime : il faut encore que vous m’aidiez à le punir. Pourveû que ce ne ſoit qu’en
