combat la le confirmoit dans l’opinion que ſon Amy eſtoit touſjours plus amoureux de Leoniſe, il fut le viſiter & s’offrir à luy. Le hazard ayant fait que j’eſtois chez Beleſis lors qu’il y vint, je fus teſmoin de leur entre veuë : il eſt vray que je fus extrémement ſurpris, de voir avec quelle froideur Beleſis reçeut Hermogene : de ſorte que craignant qu’une longue converſation entre eux, ne cauſaſt quelque malheur, je dis à Hermogene que j’avois à l’entretenir de quelque affaire, & je l’emmenay aveque moy : ne pouvant aſſez m’eſtonner du procedé de Beleſis. Cependant ce combat acheva d’irriter Cleodore contre luy, & de la confirmer dans le deſſein qu’elle avoit de s’en vanger, en luy oſtant Leoniſe, & en eſpouſant Hermogene : principalement quand elle sçeut avec quelle froideur il avoit reçeu ſa viſite. D’autre part le Prince de Suſe teſmoigna avoir tant de colere contre Beleſis, que ſes Amis luy dirent qu’ils ne croyoient pas qu’il y euſt de ſeureté pour luy à demeurer à la Cour : & que du moins ils luy conſeilloient de garder le logis durant quelques jours. Il n’y eut pourtant pas moyen de l’obliger à ne ſortit point : parce qu’il vouloit s’eclaircir ſi le Portrait de Cleodore eſtoit entre les mains d’Hermogene. Comme il s’en alloit donc un matin chez ſon Amy ſur le pretexte de luy rendre ſa viſite, afin de luy demander ce qui en eſtoit ; il aprit que ſon Mariage eſtoit reſolu avec Cleodore : & que dans peu de jours on en devoit faire la ceremonie. De vous repreſenter ce qui ſe paſſa dans le cœur de Beleſis, c’eſt ce que je ne vous sçaurois dire, quoy qu’il me l’ait raconté fort exactement : ce qu’il y a de vray, eſt que n’eſtant pas bien d’accord avec luy meſme, au lieu d’aller droit chez Hermogene, comme il en avoit
