tous ces autres Princes s’y trouverent, excepté le Roy de Phrigie, qui estoit aupres de Ciaxare, pour tascher de le fléchir. Et comme Artamene estoit le sujet de tous leurs discours, en l’estat qu’estoient les choses ; ils ne les virent pas plustost qu’ils leur en parlerent ; & leur apprirent que Ciaxare estoit tousjours irrité. En suitte, le Roy d’Hircanie s’adressant à Chrisante, le pria de luy dire, si luy qui avoit une si grande part à l’amitié, & à la confidence d’Artamene ; & qui avoit tousjours esté aupres de luy depuis si long temps (à ce qu’il avoit entendu dire, depuis qu’il estoit arrivé à la Cour de Ciaxare, lors qu’il n’estoit que Roy de Capadoce) n’avoit rien sçeu qui peust les instruire de sa naissance ; afin de voir si par ce costé là, ils ne pourroient point trouver les moyens d’interesser à sa conservation, le Prince dont il seroit nay subjet : ou de se servir du moins de ce pretexte, pour tenir Ciaxare en suspens, en attendant que sa colere fust passée. En effet, adjousta Hidaspe, le moyen que l’Armée de Ciaxare estant composée de tant de Nations differentes, il ne soit pas de quelqu’une de celles-là ? & si cela est, il est bon de le sçavoir : puis que ce seroit encore un puissant motif pour luy concilier les cœurs de ceux qui auroient la gloire d’estre nais sous mesmes loix, & sous mesme Prince. Que si aussi il est nay dans le Party de nos Ennemis ; peut-estre que Ciaxare sçachant qu’il a entre ses mains un homme de cette importance, sera bien aise de le conserver, pour en tirer quelque advantage contre eux. Hidaspe ayant cessé de parler, tous les autres approuverent ce qu’il avoit dit : & Thrasibule adjousta, que peut-estre mesme tireroient ils de cette connoissance, celle des raisons de l’intelligence d’Artamene, avec le Roy d’Assirie, &
