Amy particulier d’Aribée ; qui sçachant sa mort, en conçeut beaucoup de ressentiment contre Artamene. Si bien qu’ayant sçeu fortuitement que le Roy d’Assirie luy avoit escrit, il fut en advertir Ciaxare ; qui au mesme instant envoya querir Artamene. Il ne le vit pas plustost, qu’il luy demanda d’un ton, fort aigre, pourquoy il ne luy avoit pas dit que le Roy d’Assirie luy avoit escrit depuis sa fuite ? Artamene surpris de cette demande, parce que la Lettre dont il s’agissoit (parlant de l’amour du Roy d’Assirie & de la sienne) n’estoit pas de nature à estre monstrrée ; fut un moment sans respondre : en suitte dequoy il dit à Ciaxare, qu’il avoit eu de si fascheuses choses à luy apprendre tout à la fois ; qu’il n’estoit pas fort estrangge, qu’il en eust oublié une de si peu d’importance que celle-là : puis qu’il estoit vray que le Roy d’Assirie ne luy avoit escrit, que pour luy mander qu’il n’avoit rien crû faire contre la generosité, en s’échapant de ses Gardes, puis qu’on ne l’avoit pas laissé sur sa foy. Nous sçaurons plus precisément, luy respondit Ciaxare, ce que le Roy d’Assirie vous a mandé en nous monstrrant son Billet, que nous ne l’aprenons par vos paroles. Seigneur, repliqua Artamene, je voudrois bien pouvoir satisfaire vostre Majesté : mais ayant esté tout un jour le long de la Côste, à chercher des nouvelles de la Princesse, j’ay eu le malheur de perdre les Tablettes que j’avois reçeuës : & je m’imagine qu’elles pourront bien estre tombées dans la Mer. Cette responce faite avec assez de froideur surprit Ciaxare : & l’obligea de dire à Artamene contre sa coustume, avec beaucoup de rudesse ; que ce cas fortuit luy sembloit estrangge : & que sa procedure en cette rencontre, ne la luy sembloit pas moins. Mais comme Artamene avoit un
