Cyrus n’avoit que Mandane dans le cœur, & qu’elle luy avoit écrit qu’elle s’en alloit à Epheſe : pour en eſtre pleinement éclaircy, il reſolut d’y envoyer Feraulas déguiſé : sçachant bien qu’il ne pouvoit choiſir perſonne qui peuſt agir avec plus d’adreſſe, plus d’eſprit, & plus d’affection que luy. Joint que puis que Marteſie eſtoit avecque Mandane, il y avoit un redoublement d’obligation pour luy, à travailler à la liberté de cette Princeſſe. Il accepta donc cette commiſſion avecques joye : & pendant que Cyrus tarda en Capadoce, pour laiſſer un peu repoſer ſes Troupes, & pour s’informer un peu mieux des deſſeins de Creſus : il prit le chemin d’Epheſe, apres s’eſtre traveſti, ſans eſtre accompagné que d’un Eſclave ſeulement. Le Roy d’Aſſirie de ſon coſté, y envoya auſſi un homme tres fidelle & tres entendu en toutes choſes : cependant Cyrus recevoit des advis de toutes parts, des grands preparatifs de guerre que l’on faiſoit à Sardis : mais quoy qu’on luy diſt, & quoy qu’on luy mandaſt, on ne parloit point de Mandane : & on ne diſoit point meſme avec certitude, ce que Creſus vouloit faire.
Durant qu’il eſtoit en cette peine, on luy vint dire que le Roy de Phrigie venoit le trouver en diligence : parce qu’il eſtoit arrivé le matin à ſa Tente trois Eſtrangers que l’on ne connoiſſoit pas, qui luy avoient apris quelque grande nouvelle : du moins à ce que l’on en pouvoit juger, par l’émotion qu’il avoit euë en leur parlant. Un moment apres ce Prince entra, comme un homme qui avoit en effet de grandes choſes dans l’eſprit : Seigneur, dit-il à Cyrus, il eſt bien juſte que je vous parle de vos intereſts, avant que de vous entretenir des miens : & que je vous die que je vous amene un
