homme qui a veû aborder la Princeſſe Mandane à Epheſe : & qui vous peut du moins aſſurer qu’elle n’a pas fait n’aufrage. Cyrus tout tranſporté de joye d’entendre le Nom de Mandane, & de sçavoir du moins avec certitude ou elle eſtoit ; demanda avec empreſſement au Roy de Phrigie, où eſtoit celuy qui luy avoit aporté cette nouvelle ? de ſorte que ce Prince le faiſant aprocher (car il l’avoit amené aveques luy) le preſenta à Cyrus : qui le reçeut avec une douceur qui n’eſtoit pas moins une marque de ſon amour pour Mandane, que de ſa civilité naturelle. Cét homme qui eſtoit Grec, & qui ſe nommoit Soſicle, eſtant de fort bonne condition, & ayant beaucoup d’eſprit, reſpondit à Cyrus avec beaucoup de reſpect : & luy aprit fort exactement tout ce qu’il vouloit sçavoir de luy. Il luy dit donc qu’eſtant à Epheſe, il avoit veû aborder un Vaiſſeau Cilicien : & qu’il avoit sçeu apres au Port, que le Roy de Pont eſtoit dedans. Qu’en effet il l’en avoit veû deſcendre, & en ſuitte la Princeſſe Mandane, que le Gouverneur d’Epheſe avoit logée magnifiquement. Il luy dit encore, que cette Princeſſe eſtant allée au Temple de Diane pour faire ſes devotions, s’eſtoit miſe parmi les Vierges voilées qui y demeurent. Que le Roy de Pont l’ayant sçeu, avoit voulu faire effort pour l’en retirer : mais que le Peuple s’eſtoit eſmeû, & ne l’avoit pas voulu ſouffrir ; de ſorte qu’il avoit falu qu’il ſe contentaſt que le Gouverneur d’Epheſe fiſt faire une garde fort exacte aux Portes de la Ville, & à l’entour de ce Temple, juſques à ce que l’on euſt eu ordre de Creſus, vers lequel il avoit auſſi toſt : envoyé, & que les choſes eſtoient en cét eſtat, lors qu’il eſtoit parti d’Epheſe. Cyrus fit encore cent queſtions à Soſicle ; apres
