Pere & Gouverneur du Chaſteau d’Hermes ; & ſi vous eſtes ce meſme Ligdamis que j’ay oüy dire qui faiſoit autrefois profeſſion d’eſtre ennemy declaré de l’amour, & preſques de tous ceux qui en avoient ? Madame, je ſuis ſans doute celuy que vous dites, repliqua-t’il, quoy que je ne ſois plus ce que j’eſtois. Cleonice rougit au diſcours de Ligdamis : mais pour le changer adroitement, elle dit ſans qu’on le luy demandaſt, qu’eſtant demeurée malade à la campagne, chez une de ſes parentes, elle n’avoit pû ſe rerirer pluſtost à Epheſe où elle demeuroit : & qu’elle n’auroit meſme oſé s’y haſarder, ſi Ligdamis ne luy euſt offert de l’eſcorter en meſme temps qu’une Sœur qu’il a, qu’elle monſtra à Panthée, & qui eſtoit une fort belle Perſonne. Cyrus aprenant par cette converſation le nom & la qualité de ce priſonnier, le traitta encore plus civilement qu’il n’avoit fait : s’imaginant que cela ne ſeroit pas inutile au deſſein qu’avoit le Prince Artamas. De ſorte qu’apres avoir fait ſa viſite de longueur raiſonnable, il laiſſa ces belles Priſonnieres aupres de Panthée : ordonnant à Araſpe de les traitter avec toute la douceur & toute la courtoiſie poſſible. Mais pour Ligdamis, il le mena avecques luy : aſſurant ces Dames qu’il en auroit autant de ſoin, que Panthée en auroit d’elles. En effet en s’en retournant au Camp, il luy parla touſjours : et. luy dit que pour luy teſmoigner combien les Amis du Prince Artamas luy eſtoient chers, il le laiſſeroit ſur ſa foy : & qu’il n’auroit point d’autres Gardes que ſa propre generoſité. Ligdamis reſpondit à ce diſcours avec toute la ſoûmiſſion, & toute la reconnoiſſance imaginable : & fit ſi bien paroiſtre la grandeur de ſon eſprit par ſes judicieuſes reſponses ; que Cyrus dit alors à ſa