gloire, qu’il n’avoit jamais tant eſtimé perſonne en ſi peu de temps. Lors qu’il fut arrivé à ſa Tente, il donna ordre à Feraulas d’avoir ſoing de ce Priſonnier, comme d’un homme de qui il vouloit gagner l’amitié : cependant comme il avoit remarqué certaines paroles que Ligdamis avoit dites, & que Cleonice avoit rougy deux fois en parlant de luy : il s’imagina qu’il en eſtoit amoureux, ou pour mieux dire il le connut. Touteſfois pour s’en eſclaircir, il ordonna à Chriſante qui s’en retournoit à ſon Quartier, de dire à Araſpe en paſſant, qu’il fiſt tout ce qu’il pourroit, pour sçavoir ſi Ligdamis n’eſtoit point amoureux de Cleonice ; parce qu’il luy importoit de toutes choſes de le sçavoir preciſément. Il luy ordonna meſme de luy dire encore ; que s’il ne pouvoit l’aprendre par une autre voye, il allaſt trouver la Reine de la Suſiane de ſa part, pour la ſupplier de vouloir luy dire ce qu’elle en sçavoit, & pour l’aſſurer qu’il pourroit arriver que pat cette connoiſſance, la guerre de Lydie finiroit ſans combatre : & que ainſi elle auroit la ſatisfaction de ne voir point ſon cher Abradate en peril : mais qu’il la conjuraſt de luy pardonner ce manquement de reſpect : puis qu’il croyoit que c’eſtoit le ſeul qu’il avoit eu pour elle depuis ſa priſon. Chriſante obeïſſant donc à Cyrus, fut en effet trouver Araſpe, à qui il dit ce que leur maiſtre vouloit qu’il fiſt : mais quelque volonté qu’il euſt de luy obeïr, il ſe trouva touteſfois un peu embarraſſé à s’eſclaircir de ce qu’il vouloit sçavoir : n’eſtant pas trop dans l’ordre d’aller demander une ſemblable choſe à des Priſonnieres joint qu’il eſtoit à croire que quand il le demanderoit, elles ne le diroient pas. De ſorte qu’il creût que le mieux eſtoit de taſcher de sçavoir la choſe,