Tigrane, & Phraarte qui avoient auſſi veu un inſtant apres luy ce qu’il avoit veu le premier, ne l’euſſent forcé de prendre une route du Bois que Ligdamis leur enſeigna. Ils ne purent pourtant pas s’y enfoncer trop avant : car comme ils avoient eſté aperçeus par les troupes de Lydie, celuy qui eſtoit à leur teſte, apres avoir fait faire alte au gros qu’il commandoit, fut luy meſme les reconnoiſtre avec cent chevaux : ne pouvant touteſfois s’imaginer que ce fuſſent des Troupes ennemies, à cauſe qu’il croyoit que Cyrus n’alloit point de paſſage ſur la Riviere d’Hermes. Neantmoins pour ne rien negliger, il y fut, mais à peine eut-il fait vingt pas dans le Bois qui eſtoit fort clair en cét endroit, qu’il connut diſtinctement que ce n’eſtoient pas des Lydiens : & il remarqua de plus qu’ils n’eſtoient pas en grand nombre. De ſorte qu’allant apres eux, & envoyant commander à ceux qu’il avoit laiſſez dans la Plaine qu’ils vinſſent le joindre, afin de vaincre ſans peine & ſans peril : il en fut bien-toſt aſſez proche pour lés attaquer : & d’autant plus que Cyrus marchant le dernier, comme ayant encore plus de repugnance à fuir que tous les autres, ne pût entendre ſi prés de luy des gens qui l’apelloient au combat, ſans tourner teſte, & ſans mettre l’eſpée à la main : eſperant meſme par cette action. De courage, faciliter la retraite de ſes Amis & la ſienne. Cyrus ſe tournant donc bruſquement vers ce Capitaine Lydien, qui marchoit à la teſte des ſiens ; il pouſſa ſon cheval vers luy, avec tant de vigueur, & l’attaqua le premier avec un action ſi menaçante & ſi fiere, qu’il le contraignit de parer en pliant, & de le reculer de quelques pas. Tous les ſiens meſme s’en arreſterent un inſtant :
