mais Cyrus ayant redoublé un ſecond coup que ce Capitaine ne put parer, & qui fit voir un ruiſſeau de ſon ſang à tous ceux qui le ſuivoient comme ce Prince voulut aller apres ſes Amis, & prendre le meſme chemin qu’eux, il ſe vit environné de toutes parts, & ſans aucun eſpoir d’eſchaper. Il en tua pourtant un d’abord : mais la multitude l’auroit aſſurément accablé, ſi Feraulas qui pair bon heur avoit tourné la teſte & avoit entreveu Cyrus en ce peril, n’y fuſt allé en appellant Chriſante à ſon ſecours, qui y fut en diligence auſſi bien que le Prince Tigrane, Phraarte, Anaxaris, Aglatidas, Ligdamis, & pluſieurs autres : car pour le Roy d’Aſſirie qui marchoit aſſez loin devant, avec le Prince Artamas & le reſte, ils furent attaquez par un autre gros d’ennemis que l’on avoit envoyé pour leur couper chemin. Jamais il ne s’eſt entendu parler d’une pareille choſe, à celle qui qui ſe paſſa dans ce Bois : car Cyrus sçachant que la liberté de Mandane, eſtoit attachée à la ſienne & à ſa vie, deffendit l’une & l’autre avec une valeur qui n’eut jamais d’eſgale. Ceux qui l’attaquerent perirent preſques tous de ſa main : & peu de ceux qu’il attaqua, purent eſtre aſſez diligents à fuir, ou aſſez adroits à parer, ou aſſez vaillants pour luy faire reſistance : de ſorte que de tous ceux qui l’environnerent d’abord, il y en eut tres peu qui ne ſentissent la peſanteur de ſon bras. La valeur de Tigrane ſe ſignala auſſi en cette occaſion, auſſi bien que celle de Phraarte : & l’inconnu Anaxaris fit des choſes ſi admirables, qu’elles le firent connoiſtre à Cyrus pour un des plus vaillants hommes du monde. Aglatidas, Ligdamis, Chriſante, & Feraulas, donnerent auſſi des marques