Qu’en le congediant, elle luy avoit fait un present fort magnifique, & l’avoit chargé do luy dire, apres qu’elle avoit apris avec estonnement qu’il estoit Artamene ; que le Roy son Mary alloit tascher de se mettre en estat de respondre un jour à sa libéralité : & de faire en sorte que Spitridate son Fils, qui avoit la gloire de luy ressembler, ne passast pas le reste de ses jours sans se rendre digne de cette ressemblance. Cét homme aprit encore à Artamene, qu’en s’en revenant il avoit trouvé toute la Campagne couverte de Gens de guerre ; qu’il avoit mesme esté arresté durant quelques jours ; & que c’estoit ce qui l’avoit tant fait tarder. Deux heures apres son arrivée, il vint nouvelles assurées d’Artaxe, que toute la Bythinie s’estoit revoltée ; que le Pont alloit faire la mesme chose ; & que le Roy de Phrigie avoit esté contraint de se retirer : parce que Cresus Roy de Lydie, estoit entré à main armée dans ses Estats : joint qu’une partie de ses Troupes avoient changé de Party : & avoient pris celuy luy de ceux qui avoient fait souslever les Peuples, & qui avoient veritablement beaucoup de droit à la Couronne de Bythinie. Enfin l’on sçeut qu’Arsamone Mary de cette Dame, qui avoit si bien reçeu Artamene lors qu’il estoit blessé, & qui l’avoit pris pour Spitridate son Fils, estoit à la teste d’une Armée tres considerable : & que si l’on ne mettoit le Roy de Pont en liberté, pour y donner ordre, & pour s’opposer à ses conquestes ; non seulement la Bythinie que ses Peres avoient usurpée seroit perduë pour luy ; mais que le Pont qui luy apartenoit legitimement le seroit aussi. L’on disoit bien que le Roy de Phrigie faisoit faire de nouvelles levées dans ses Païs : mais en mesme temps l’on disoit aussi, qu’il estoit
