fâché de n’oser luy aller demander, ce qu’Artamene luy avoit dit. Cependant la Reine qui ne pouvoit pas se resoudre de se pleindre de mon Maistre, fit esclatter toute sa colere contre Indathirse : disant qu’il l’avoit extrémement offencée, en offençant un Ambassadeur dans sa Cour. Artamene l’ayant sçeu par le retour de Chrisante, fut luy mesme la supplier de ne le refuser pas : où si elle vouloit punir Indathirse, qu’elle n’avoit qu’à se resoudre de le punir aussi de la mesme sorte. Elle voulut le presser de luy dire la cause de ce combat, mais il ne le voulut pas faire : & il la contraignit enfin, de pardonner esgalement à Indathirse & à luy. Aripithe bien fâché d’avoir este prevenu par Indathirse, & plus fâché encore de voir mon Maistre eschapé de ce combat & victorieux, se resolut, à ce que j’ay sçeu, malgré l’interest qu’y prenoit la Reine de le quereller à son tour, & d’en chercher l’occasion. Cependant le Prince des Tauroscithes qui mouroit d’impatience d’estre esclaircy de la bouche d’Artamene, de tout ce qu’il luy avoit dit ; l’envoya sommer fort civilement de sa parole, que mon Maistre luy tint le mesme jour. Il fut donc le voir à la Tente : où il luy advoüa qu’il estoit venu à cette Cour, pour proposer adroitement à la Reine, son mariage avec Ciaxare. Mais que sans qu’il en peust dire la raison, il l’en voyoit fort esloignée : & qu’il commençoit de voir qu’infailliblement il s’en retourneroit sans avoir fait autre chose, que l’affaire qui regardoit les pleintes qu’il avoit faites des Pyrates de la mer Caspie : qui n’estoient que le pretexte de son voyage. Ainsi, luy dit il, Seigneur, vous jugez bien que je ne suis pas coupable : & que je ne le seray mesme pas encore, quand je continuëray
