elle ſe laiſſa habiller : & dit en ſoupirant, que le changement d’habits n’en aporteroit point en ſon cœur. Je voulus luy faire comprendre la raiſon que l’on m’avoit donnée, mais elle n’en fut pas ſatisfaite : & ne pût ſe conſoler de cette nouvelle eſpece de contrainte. Cependant le Roy d’Aſſirie & Mazare eſtant fort reſolus à punir le Peuple, ne ſongeoient qu’à donner les ordres neceſſaires pour cela : & ſi les Babiloniens eſtoient en armes, tous les Gens de guerre y eſtoient auſſi. Le Roy en ſa propre perſonne, ſuivy de tout ce qu’il y avoit de Princes & de Grands dans ſa Cour, eſtoit preſt d’aller aprendre au Peuple quel eſt le reſpect qu’il doit à ſes Princes legitimes, lots qu’un Eſpion qu’il avoit dans l’Armée de Ciaxare, vint luy donner advis tout effrayé, que dans trois ou quatre heures au plus tard, à l’entrée de la nuit, il verroit tout d’un coup tarir l’Euphrate ; & entrer quarante mille hommes par les deux bouts de la Ville. D’abord le Roy d’Aſſirie n’en voulut rien croire : mais l’autre luy marqua ſi preciſément l’endroit où il diſoit qu’Artamene avoit fait creuſer deux grandes Tranchées pour deſtourner le Fleuve quand il ſeroit temps ; qu’il fut contraint d’adjouſter foy à ſes paroles. Joint que ce qui eſtoit deſja arrivé au Fleuve du Ginde, luy rendoit la choſe plus vray-ſemblable. Cét Eſpion luy dit encore, que ſans la neige qui avoit un peu empeſche les Pionniers, la choſe auroit deſja eſté executée, mais quoy qu’il la circonſtantiast fort ; le Roy d’Aſſirie fut toutefois avec Mazare, ſur la plus haute des Tours du Temple de Jupiter Belus, pour mieux deſcouvrir de là les Travaux de ſes Ennemis : & comme ils y furent, cét Eſpion luy fit remarquer, quoy que de fort loing,
