ne puis vous rien dire de ce que vous voulez sçavoir : & je sçay ſeulement que Cleanthe, Megiſto, Policrite, & Doride, ne ſont plus icy, & n’y doivent plus revenir. Ils ont emmené avec eux, les femmes qui eſtoient de leur païs : & mon Maiſtre m’a commandé d’attendre icy de ſes nouvelles : ſans que je sçache ny pourquoy il eſt party, ny pourquoy il m’a laiſſé. Philoxipe ſurpris & affligé de ce diſcours, fut aſſez long temps ſans parler : le Roy s’imagina d’abord, qu’il y avoit de l’artifice : & que Philoxipe ne m’avoit fait dire ce que j’avois dit que pour l’abuſer. Mais enfin ce jeune Eſclave eſtant rentré dans la Maiſon, & revenu un moment apres ; Seigneur, dit il à Philoxipe, lors que Policrite fut preſte à partir d’icy, elle me tira à part, ſans que perſonne le viſt : & me donna ce que je remets entre vos mains : avec ordre ſi vous veniez icy de vous le bailler. Philoxipe prenant à l’inſtant meſme des Tablettes que cét Eſclave luy preſenta, les ouvrit, pendant que le Roy me faiſoit l’honneur de me parler, à huit ou dix pas de là, & il y leût ces paroles.
