quoy qu’il ne peust pas parler sans incommodité ; neantmoins il ne laissa pas de la vouloir desabuser. Si j’estois celuy que vous pensez que je sois, luy respondit il, croyez Madame, que je ne le desadvoüerois pas : mais comme je ne le suis point du tant, il faut aussi que je ne vous laisse pas dans vostre erreur, bien qu’elle me peust estre avantageuse. Quoy, s’escria cette Dame, vous n’estes pas mon Fils ? Non Madame, luy respondit mon Maistre ; & bien loing d’avoir assisté un Fils, vous avez secouru va Ennemy. Mais un Ennemy qui n’a pourtant rien fait, qui raisonnablement vous doive irriter en particulier contre luy : puis qu’il n’a eu autre dessein, que de bien servir le Roy dans le party duquel il est engagé. Je voy bien mon fils, luy dit elle en l’interrompant, que vous avez de la confusion de ce que vous avez fait : & que vous ne vous resoudrez point à m’avoüer ce que vous estes, que nous n’ayons sçeu des nouvelles des deux personnes qui vous font si proches, & que vous avez peut-estre combatües sans les connoistre. J’y consens, luy dit elle en le quittant ; aussi bien n’est il pas fort à propos de vous donner nulle esmotion en l’estat où vous estes. Apres cela cette Dame sortit de la Chambre, & laissa mon Maistre dans un estonnement estrangge : voyant qu’on le prenoit pour ce qu’il n’estoit pas. Il passa toutefois la nuit assez doucement : car comme il avoit perdu beaucoup de sang, la fiévre ne luy prit pas d’abord : & la lassitude l’ayant fait dormir, il se trouva le lendemain aussi bien qu’un homme qui avoit deux grandes blessures se pouvoit trouver. Cette Dame ne manqua pas de le visiter de bon matin, & de recommencer ses pleintes : elle voyoit