homme fut arrivé, il s’en vint à moy, & penſant m’obliger (car mes ſentimens eſtoient devenus aſſez publics depuis ma jalouſie. ) Et bien, me dit il, enfin le Prince Artibie ſera vangé, & Antigene ne poſſedera point Leontine : comment, luy dis-je, eſt-ce qu’elle l’a quitté pour un autre, comme elle m’avoit quitté pour luy ? Non dit il, mais c’eſt qu’elle eſt morte effectivement cette fois cy. Leontine eſt morte ! luy dis-je ; ouy, repliqua-t’il, elle eſt morte à Chalcis où ſon Pere l’avoit menée : En effet je sçavois qu’elle eſtoit en l’Iſle d’Eubée pour quelques jours : car comme elle n’eſt ſe parée de la Beoce que par un tres petit bras de mer, toutes les Maiſons de qualité ont des alliances d’un lieu à l’autre ; & Leontine avoit une Tante à Chalcis. Cét homme me dit donc qu’il eſtoit venu nouvelle certaine à Thebes, que Leontine eſtoit morte : & qu’il y avoit meſme un de ſes Amis qui luy avoit aſſuré dans le Temple d’Apollon Iſmenien, qu’il avoit veû faire ſes funerailles à Chalcis. Je le regarday alors ſans luy rien dire : puis le quittant bruſquemant, je m’eſloignay de la Compagnie l’eſprit fort troublé, & ſans sçavoir moy meſme ce que je ſentois. Je ſouffris pourtant beaucoup : & je fus me perdre dans un Bois qui eſtoit derriere la maiſon où j’eſtois, afin que Polimnis ne me peuſt trouver s’il me cherchoit. Je fus donc plus d’une heure en un eſtat que je ne vous sçaurois repreſenter : Mon ame eſtoit affligée : mon cœur eſtoit ſensiblement touché ; & ma raiſon meſme ne s’opoſoit pas au trouble de mon eſprit. Je voulus pourtant me perſuader, que perdre celle qui m’avoit maltraitté & que je haiſſois, eſtoit pluſtost un bonheur qu’une infortune : Mais helas mon imagination ne me repreſenta pas pluſtost cette admirable Perſonne dans le Tombeau, que ma
