fait faire avec un fort grand ſoing. Et en effet, elle le luy avoit donné : mais à quelque temps de là, Polycrate devant s’embarquer pour s’en aller à la guerre, chacun allant dire adieu à ſes connoiſſances, il fut grand nombre de perſonnes de qualité chez Acaſte, pour prendre congé d’elle : & entre les autres Theanor y fut, comme elle venoit de ſortir, pour aller faire quelque viſite. Et comme il ne trouva perſonne en bas, il monta dans ſa chambre, & vit ſur ſa Table le Portrait d’Alcidamie qu’elle y avoit oublié : de ſorte qu’aimant paſſionnément comme il faiſoit, & eſtant preſt de s’eſloigner de Samos, il fit ce que je penſe que j’euſſe fait comme luy, ſi j’euſſe eſté à ſa place : c’eſt à dire qu’il oſta la Peinture de la Boiſte où elle eſtoit, qui eſtoit trop riche pour la prendre : & ſortit ſi heureuſement, qu’il ne fut veû de perſonne. Un moment apres Timeſias qui eſtoit Parent d’Acaſte, & qui aimoit auſſi Alcidamie, entra dans la meſme Maiſon, ſans trouver perſonne non plus que luy : & fut à la chambre de ſa Parente, qu’il trouva au meſme eſtat que Theanor l’avoit laiſſée : je veux dire ouverte, & ſur la Table la Boiſte de Portrait, qu’il avoit oublié de refermer. De ſorte que Timeſias qui l’avoit veuë pluſieurs fois entre les mains de ſa Parente, ne pût comprendre pourquoy la Peinture n’y eſtoit plus : ſi bien que faiſant du bruit pour faire venir quelqu’un à luy ; des femmes qui eſtoient dans une Garde-robe proche de là ſortirent : & il leur demanda d’où venoit que cette Boiſte de Portrait eſtoit ſur la Table, ſans que la Peinture fuſt dedans ? Ces femmes toutes ſurprises, dirent qu’elles n’en sçavoient rien : qu’il n’y avoit pas un quart d’heure qu’elle y eſtoit ; &
