rendu ce bon office. Aglatidas s’oppoſa encore à ce que Cyrus vouloit de luy : & il fut contraint de luy accorder ce qu’il ſouhaittoit ſans nulles conditions. Comme Ciaxare n’eſtoit plus en termes de rien refuſer, à celuy à qui il devoit tout ; il ne luy eut pas pluſtost demandé ce Gouvernement qu’il le luy accorda : envoyant à l’heure meſme les expeditions à Ecbatane. Il s’eſtonna touteſfois, par quelle raiſon il luy faiſoit cette priere, sçachant qu’Otane n’eſtoit pas connu de Cyrus : & que quand il l’auroit connù, il ne l’auroit pas fort aimé. Comme cela fit quelque bruit dans la Cour tout le monde chercha par quel motif Cyrus avoit fait la choſe ; & Megabiſe qui sçavoit quel eſtoit l’intereſt d’Ameſtris en cela, fut celuy qui en devina le ſujet, & qui s’imagina que Cyrus n’avoit agi qu’à la priere d’Aglatidas : de ſorte que tout le monde le sçeut bientoſt apres ; & admira ſa generoſité. Ce meſme jour là, il vint un Envoyé du Roy d’Aſſirie, qui ayant sçeu par la voix publique, au lieu où il s’eſtoit retiré apres ſon départ de Pterie, que la principale raiſon pourquoy on retenoit Cyrus priſonnier, eſtoit parce qu’on l’accuſoit de l’avoir fait delivrer, & d’avoir intelligence aveque luy : avoit reſolu de luy rendre une partie de ce qu’il devoit à ſa generoſité, en le juſtifiant de cette accuſation. Cyrus ne sçeut pas pluſtost que cét Envoyé eſtoit arrivé à Sinope, qu’il ſe rendit aupres de Ciaxare : luy diſant qu’il ne vouloit voir qu’en ſa preſence, celuy que le Roy d’Aſſirie luy envoyoit. Ciaxare luy dit alors fort obligeamment, que c’eſtoit luy faire un reproche injurieux, que de le faire ſouvenir de ſes erreurs paſſées : mais enfin Cyrus l’emporta : & l’Envoyé du Roy d’Aſſirie