du Roy de Pont qu’il n’en apporta ? Je sçay Seigneur, luy reſpondit il, preſques tout ce que je pouvois sçavoir, excepté que je n’ay pas bien veû la Princeſſe Mandane, & que l’on ne m’a pas dit ſon Nom : mais enfin pour vous raconter ce que j’ay apris, je vous diray qu’avec l’habit que vous me voyez ; & sçachant aſſez bien la langue Armenienne, j’ay touſjours eſté pris pour un veritable Armenien, meſme dans Artaxate, où la Cour eſt preſentement. Là je me ſuis meſlé avec diverſes perſonnes : & j’ay sçeu que le Roy d’Armenie dit touſjours que la Princeſſe Mandane n’eſt point dans ſes Eſtats : & qu’il publie qu’on ne la luy demande que pour avoir encore un plus grand pretexte de luy faire la guerre, à cauſe du tribut qu’il n’a pas voulu payer. Le Peuple meſme à ce que j’ay appris, l’a creû long temps ainſi : mais depuis quelques jours ce meſme Peuple a changé d’avis : & tout le monde croit qu’effectivement la Princeſſe Mandane eſt preſentement dans un Chaſteau qui n’eſt qu’à cinquante ſtades d’Artaxate : du coſté qui regarde vers les Chaldées, & qui eſt baſti ſur le bord d’une petite Riviere, laquelle ſe jette en ce lieu là dans l’Araxe, qui paſſe dans Artaxate. Ce qui fait qu’ils ont cette croyance, eſt qu’ils sçavent que dans le meſme temps qu’ils ont apris que l’on diſoit que la Princeſſe Mandane y doit eſtre, il eſt arrivé deux Dames, que quelques hommes conduiſoient, que l’on a miſes dans ce Chaſteau ; que l’on y garde tres ſoigneusement ; & que l’on ſert avec beaucoup de reſpect. Quelques uns de ceux qui les ont veuës, ont dit de plus, qu’il y en a une admirablement belle, & qui paroiſt fort melancolique. Je me ſuis informé auſſi exactement que je j’
