le retranchement que les Armeniens avoient fait, ayant eſté forcé en un quart d’heure, il ſe vit dans le Païs Ennemy, & Maiſtre de la Riviere, ſans avoir perdu que quinze ou vingt Soldats, en une occaſion où tout ce qui fit reſistance fut taillé en pieces, & entierement deffait. Lors qu’il eſtoit party de Sinope, il avoit eu intention d’attendre toute l’Armée en ce lieu là, apres s’en eſtre aſſuré : mais comme le pouvoir qu’il avoit eſtoit abſolu, il changea de deſſein : & il prit celuy de delivrer Mandane, s’il eſtoit poſſible, auparavant que le Roy fuſt arrivé : luy ſemblant que moins il auroit de gens à partager le peril qu’il y avoit en cette entrepriſe, plus cette Princeſſe luy en ſeroit obligée, & plus cette action en ſeroit glorieuſe. Ce qui le confirma encore en cette reſolution, fut la nouvelle qu’il reçeut, que Ciaxare s’eſtant trouvé mal, ſon départ avoit eſté differé de trois jours : & qu’à cauſe de cét accident, ſa marche ſeroit plus lente. Mais ce qui le pouſſa plus fortement que tout cela, à cette dangereuſe entrepriſe, fut qu’il sçavoit que le Roy d’Aſſirie devoit venir : & qu’il ne pût ſe reſoudre à endurer que ſon Rival partageaſt aveques luy la gloire de delivrer ſa Princeſſe.
Ne pouvant donc plus ſouffrir ce retardement, il laiſſa deux mille hommes à garder le paſſage de la Riviere : & fut droit vers la grande Ville d’Artaxate ; qui eſtoit ſcituée dans une Plaine tres fertile au bord de l’Araxe : & à peu prés au meſme lieu où par les Conſeils d’Hanibal un autre Roy d’Armenie fit longtemps depuis rebaſtir la nouvelle Artaxate. Cette Ville n’eſtoit commandée que de fort peu d’endroits : mais ſes Murailles eſtoient ſi foibles ; & meſmes
