allois luy reſpondre, la Princeſſe Ariſtée arriva, & peu apres le vaillant Pharnace, qui eut la gloire de vous reſister le dernier au Combat des deux cens : & au meſme inſtant encore le laſche Artane, qui accompagna Spitridate en ce lieu-là. Apres que la converſation eut aſſez duré, le Prince Sinneſis vint propoſer la promenade à la Princeſſe ſa Sœur, qui eut cette complaiſance pour luy ſans peine. Ce Prince pouvoit alors avoir dix-ſept ans, & la Princeſſe Ariſtée quinze : & à mon advis il luy avoit deſja donné quelques petites marques de ſa paſſion, qu’elle avoit connuës ſans les agreer, & ſans les rejetter ſuffi. Des qu’ils furent dans les Jardins, le Prince Sinneſis apres avoir parlé quelque temps à la Princeſſe ſa Sœur, donna la main à la Princeſſe Ariſtée : & Spitridate aida auſſi à marcher à la Princeſſe Araminte. De ſorte que Pharnace & Artane voyant que la ſeule place qu’ils pouvoient occuper agreablement eſtoit deſja priſe par Spitridate, s’en allerent par un ſentiment jaloux. Ce pendant le peu d’experience de cette jeune Perſonne me faiſant craindre qu’elle ne demandaſt avec trop d’empreſſement à Spitridate ce qu’il avoit dans le cœur, je la ſuivis touſjours d’aſſez prés : & ſans perdre le reſpect que je luy devois, je deſtournois la converſation avec adreſſe. Car comme ma Mere eſtoit fort mal ſaine, ainſi que je vous l’ay deſja dit, & de plus fort âgée, & que j’avois ſix ou ſept ans plus que la Princeſſe, j’agiſſois preſques comme une Sous-Gouvernante : le Roy le voulant de cette ſorte, & la Princeſſe en eſtant bien aiſe, parce qu’elle me faiſoit l’honneur de m’aimer. Mais Seigneur, pour revenir à mon diſcours, la Princeſſe Arbiane eſtant venuë dans ces meſmes Jardins, &
