SPITRIDATE. Apres que la Princeſſe eut achevé de lire cette Lettre en ſoupirant malgré qu’elle en euſt, elle pria celuy qui la luy avoit renduë, de s’aquiter de ſa commiſſion : de ſorte qu’il luy raconta ce que je vous ay deſja dit : c’eſt à dire de quelle façon Arſamone avoit envoyé querir Spitridate : comment il luy avoit parlé dans ſa chambre : comment il s’eſtoit embarqué : & ce qu’il luy avoit dit, lors qu’il avoit eſté dans le Vaiſſeau qui l’attendoit. Il luy aprit en ſuitte, que ſa Navigation avoir eſté tres heureuſe juſques à Chalcedoine : mais il luy dit qu’en arrivant en ce lieu là, le Pilote n’ayant pas bien pris ſes meſures, avoit eſté pouſſé par la violence des vagues, contre la pointe d’un rocher, qui eſt aſſez prés de l’emboucheure du Port. Que ſon Vaiſſeau n’avoit pourtant fait que s’entre-ouvrir : mais que comme Spitridate eſtoit ſur la Prouë lors qu’il avoit heurté, il n’avoit pû ſe retenir : & eſtoit tombé dans la Mer, juſtement au meſme temps qu’un autre des Vaiſſeaux d’Arſamone s’eſtoit briſé un peu plus bas. Il luy dit de plus, que tout le rivage eſtant plein de monde, il y avoit eu de Marchands de Perſepolis qui avoient teſmoigné une ſi grande compaſſion de cét accident, & un ſi grand empreſſement à vouloir ſauver Spitridate ; qu’il y en avoit eu deux, qui s’eſtoient jettez dans la Mer pour l’aſſister, & qui avoient eſté noyez ſans le pouvoir faire. Que ce pendant la Mer l’avoit emporté malgré luy bien loing de là, ſans que l’on s’en aperçeuſt dans le Vaiſſeau d’Arſamone ; où l’on eſtoit aſſez occupé, parce que l’eau y entroit, que lors que Spitridate eut un peu repris ſes eſprits, apres ſa chutte dans la Mer ; comme il sçavoit bien nager, il avoit voulu abo
