rien dit en le prenant, il ne sçavoit point ſi cette entre-veuë avoit eſté deſcouverte, ou ſi l’on n’avoit fait ſimplement que sçavoir qu’il eſtoit déguiſé dans Heraclée : mais le lendemain au matin, il fut eſclaircy de ſes doutes : car le Roy luy envoya demander ce qu’il y eſtoit venu faire ; quel deſſein il avoit eu ; & quels eſtoient les complices de ſa conjuration ? Ce Prince voyant que l’on ne luy parloit point de la Princeſſe, en eut une joye extréme : & reſpondit qu’eſtant ſorty de la priſon où le Prince ſon Pere le retenoit ; & ayant apris dans Chriſopolis que le Prince Sinneſis eſtoit Roy, il eſtoit venu à Heraclée, avec intention de chercher un Azile aupres de luy : qu’en y arrivant, il avoit eſté bien ſurpris, d’aprendre que ſon regne n’avoit duré que ſept jours : & qu’il en avoit eſté ſi affligé, qu’il n’avoit pas eu aſſez de liberté d’eſprit, pour reſoudre d’abord preciſément ce qu’il avoit à faire. Que neantmoins il avoit enfin conclu en luy meſme, de demander au Roy qui regnoit alors, la meſme protection qu’il avoit attenduë du feu Roy ſon Frere : mais qu’il n’avoit pas en loiſir d’executer ſon deſſein : puis qu’il avoit eſté pris une heure apres ſon arrivée. Ceux qui luy parloient luy dirent, que pour venir demander un Azyle au Prince Sinneſis dont il eſtoit fort aimé, il n’eſtoit pas beſoin de ſe déguiſer : il reſpondit à cela, qu’auſſi ne s’eſtoit il pas déguiſé pour venir à Heraclée : mais ſeulement pour pouvoir ſortir de Bithinie : & pour faire le reſte du voyage avec plus de ſeureté ſans train & ſans equipage, que s’il euſt eſté en habit d’un homme de ſa condition. Quoy que ſes reſponses fuſſent raiſonnables, elles ne ſatisfirent pourtant pas le Roy : & il ne douta point du tout, qu’il n’y euſt un deſſein
