main, il le mena dans la ſienne, où Artane luy dit ce qu’il avoit reſolu de luy dire. Le Roy n’eut pas pluſtost entendu, que Spitridate eſtoit déguiſé dans Heraclée, qu’il crût en effet qu’il y avoit une conjuration tramée contre luy : ſi bien que ſans perdre temps, il commanda ſecrettement au Capitaine de ſes Gardes, d’aller avec main forte à la Maiſon où Artane avoit veû entrer Spitridate ; d’y chercher ſoigneusement par tout : & de s’aſſurer de la perſonne de ce Prince s’il y eſtoit comme il en avoit eſté adverty. En fin, Seigneur, que vous diray-je ? Le Roy de Pont fut obeï : & Spitridate qui eſtoit ſeul & hors de pouvoir de ſe deffendre, fut pris par cent des Gardes du Roy ſans qu’Artane ſe monſtra à luy, & mené dans une Tour où l’on mettoit les priſonniers d’Eſtat qui eſtoient gens de haute qualité. Je vous laiſſe à juger quelle ſurprise fut celle de la Princeſſe, d’aprendre à une heure de là, que Spitridate eſtoit arreſté : d’abord elle creut que le Roy de Pont sçavoit que ce n’eſtoit que pour elle qu’il eſtoit déguiſé : mais n’entendant parler que de conjuration contre l’Eſtat, ſi elle fut en repos du coſté de ſa reputation, elle n’y fut pas pour la vie de Spitridate. Imaginez vous donc, Seigneur, qu’elle nuit elle paſſa : pour moy j’en puis reſpondre exactement : car ayant dit à ſes Femmes qu’elle ſe trouvoit mal, elle ſe mit au lict : & je leur dis que je ne la quitterois point, afin qu’elles ne l’importunaſſent pas : comme en effet je demeuray aupres d’elle, pour taſcher de la conſoler. Je ne pûs toutefois en venir à bout : parce que de quelque façon qu’elle enviſageast la choſe, elle la trouvoit tres dangereuſe pour Spitridate, qui n’eſtoit gueres plus en repos que la Princeſſe. Comme on ne luy avoit
