qu’elles eſtoient en un eſtrange deſordre. Le Roy de Phrigie qui s’eſtoit retiré, apres la perte de ces deux Batailles, à l’extremité de la Bithinie, & qui avoit repaſſé la Riviere de Sangar ; reçeut nouvelles que Creſus Roy de Lydie eſtoit entré dans ſes Eſtats, avec une puiſſante Armée : de ſorte qu’il fut contraint d’aller ſonger à ſa propre deffence, au lieu de ſonger à celle des autres. Joint que ſes Troupes eſtoient extréme ment affoiblies : neantmoins comme la Princeſſe jugeoit bien que Ciaxare tenant le Roy de Pont priſonnier, ne s’amuſeroit pas à rien entreprendre de nouveau : puis que ſans haſarder ſes Troupes, il pouvoit faire la paix à telles conditions qu’il voudroit, elle eſtoit en quelque repos. Mais à peu de jours de là, elle fut bien ſurprise d’aprendre, que tout ce qui s’eſtoit r’allié de gens de guerre, apres la priſe du Roy, s’eſtoient declarez pour Arſamone : que toute la Bithinie s’eſtoit ſouslevée en ſa faveur, & eſtoit reſoluë de retourner ſous ſon ancien Maiſtre : & que de plus, Artane qui eſtoit de la plus haute condition, eſtoit revenu dans le Royaume ; avoit auſſi fait ſouslever une partie de celuy de Pont ; & s’eſtoit emparé d’une Ville conſiderable, nommée Cabira, en ſubornant le Gouverneur par de l’argent. Je vous laiſſe donc à penſer, en quel eſtat ſe trouva cette jeune Princeſſe : de voir que le Roy ſon Frere eſtoit priſonnier : & qu’Arſamone Pere de Spitridate, non ſeulement eſtoit Maiſtre de la Bithinie, mais qu’il eſtoit encore à la teſte d’une Armée, pour venir conquerir le Royaume de Pont : & qu’ainſi il faloit qu’elle s’y oppoſast au tant qu’elle pourroit : & qu’elle fiſt la guerre contre le Pere d’un Prince dont elle eſtoit adorée, & qu’elle ne haïſſoit pas. Elle sçavoit
