mais quoy qu’il peuſt faire, comme les reſolutions des Conſeils de guerre paſſent à la pluralité des voix, & que celle du General y peut beaucoup, il falut qu’il cedaſt, & que Spitridate fiſt ce qu’il vouloit. Il envoya donc une ſeconde fois vers la Princeſſe : mais il y envoya un homme d’eſprit, & qui luy eſtoit fidelle : avec ordre de la ſupplier tres humblement, qu’il peuſt avoir l’honneur de luy parler, auparavant que d’eſtre forcé de rien entreprendre contre elle. Il luy fit dire qu’il la conjuroit par la glorieuſe memoire du Prince Sinneſis, de ne le refuſer pas : & de croire qu’il eſtoit touſjours le meſme Spitridate qu’elle avoit connu. Cét Envoyé eut cét ordre en particulier : car devant tous ſes Capitaines, ce Prince luy commanda de parler d’une façon moins tendre & moins obligeante. S’il euſt ſuivi les mouvemens de ſa paſſion, il n’euſt pas ſongé à ſa ſeureté, & ſeroit entré dans Cabira, ſans meſme obliger la Princeſſe à luy engager ſa parole : mais n’eſtant pas Maiſtre abſolu de luy meſme, & n’eſtant pas à propos de ſe rendre ſuspect aux ſiens : il ſouffrit qu’on la ſuppliast en ſon nom de ſe donner la peine de venir ſur une Platte-forme avancée, qui eſt à un coſté de la Ville, & qui n’eſtant pas fort haute, luy permettroit de luy pouvoir parler ſans qu’elle en euſt beaucoup d’incommodité. Voila donc. Seigneur, l’ordre que reçeut cét Envoyé de Spitridate : de qui l’arrivée me donna une grande de conſolation, auſſi bien qu’à la Princeſſe : qui commença alors d’eſperer, qu’elle s’eſtoit abuſée, au jugement qu’elle avoit fait de ce Prince. Neantmoins elle fut ſi ſurprise, qu’elle demanda deux heures à celuy qui venoit de ſa part pour luy reſpondre : & en effet pour pretexter la choſe, elle fit aſſembler tous les Chefs
