en prit un apres l’avoir bleſſé : qui pluſtost que de ſe laiſſer prendre, s’alloit jetter dans la mer : lors que Cyrus l’ayant joint, & l’ayant pris par les cheveux, non non, dit il, traiſtre, il faut sçavoir qui vous eſtes, & par quel mouvement vous agiſſez. A peine l’eut il arreſté, que malgré le déguiſement de ſon habit & de ſon taint, & malgré tout le ſang dont il eſtoit couvert, il le reconnut pour le méchant Metrobate : qui fit encore tout ce qu’il luy fut poſſible, ou pour s’échaper, ou pour ſe tuër, ou pour ſe jetter dans la mer : mais pluſieurs des Gardes du Roy eſtant arrivez, Cyrus le remit entre leurs mains : & s’en faiſant ſuivre, il fut retrouver Ciaxare, qui eſtoit entré chez Thiamis, de qui la Maiſon touchoit le Temple. Auſſi toſt que Cyrus parut, ce Prince l’embraſſa eſtroitement : & luy devant encore une fois la vie, il luy donna cent marques de reconnoiſſance, & cent témoignages de repentir de ce qu’il avoit fait contre luy. Seigneur (luy dit il, en faiſant aprocher ce perfide qu’il avoit pris) je rends graces aux Dieux de ce qu’ils vous feront voir la difference qu’il y a de Metrobate à moy. A peine le Roy eut il entendu ce Nom, & jetté les yeux ſur cét homme qu’il le reconnut : Ha méchant, luy dit il, eſt-ce toy qui as oſé attenter à ma vie, & à celle de Cyrus ? car le Roy avoit veû toutes les deux actions de ceux qui les avoient voulu tuër. C’eſt moy, reſpondit ce perfide fout furieux, qui las de faire des crimes inutilement, m’eſtois determiné d’en faire deux, qui me fuſſent utiles à quelque choſe. Et de qui laſche, reprit le Roy, attendois tu recompence d’une pareille action ? De tant de Rois & de tant de Princes, repliqua-t’il, qu’Artamene par ſa
