Amant du monde : car je voy fort bien qu’eſtans tous moins infortunez que moy, ils auront plus de liberté d’eſprit que je n’en ay, à vous raconter leurs avantures. Celuy qui n’eſt point aimé, voudra vous faire voir que ce n’eſt pas qu’il ne ſoit fort aimable : & n’oubliera rien pour vous le perſuader indirectement. Celuy qui pleint la mort de ſa Maiſtresse, voulant eſtre pleint, ſe pleindra avec eloquence, dans une ſaison où le temps l’a deſja ſans doute un peu conſolé : & le jaloux Leontidas ne manquera pas d’exagerer fortement ſes ſouffrances imaginaires : puis qu’il eſt poſſedé par une paſſion qui eſt accouſtumée de faire paſſer pour de grandes choſes, les plus petites que l’on puiſſe concevoir. Marteſie voyant que Thimocrate attendoit ſa reſponse, l’aſſura qu’elle ne s’attacheroit pas tant aux paroles, qu’aux avantures effectives, & qu’aux raiſons : c’eſt pourquoy, luy dit elle, ne vous fiez pas trop vous meſme à voſtre eloquence, en feignant de craindre celle d’autruy. En ſuitte de cela, Marteſie luy ayant ordonné de faire le recit de ſon amour & de ſes malheurs, il luy obeït, & commença de cette ſorte.
