qu’il le tenoit au commencement pour un ange, mais que lui ayant presagé tant de malheurs, il ne le tenoit plus que pour un diable, qui avoit pris des moutons avecque luy, et une houlette en sa main pour se rendre moins effroyable, et luy faire acroire qu’il estoit de sa condition. Enfin tout ce que nous pouvons juger de ce qu’il m’a dit, continua-t’il, c’est que cette maudite femme qui est icy pour massacrer tous les hommes, et mettre la fin au monde, ne peut estre autre que la femme de l’antechrist, et je croy presque que cettuy cy à qui j’ay parlé est l’antechrist mesme, car il se vante de pouvoir beaucoup. Comme ce berger eut dit cecy, il y eut un paysan plus resolu que les autres, qui tira à quartier quelques-uns de ses compagnons, et leur remonstra
