Cette page n’a pas encore été corrigée
Carmelin, il luy fit bien des questions. N’as-tu pas veu la nompareille Charite ? Luy disoit-il ; n’est-ce pas le plus bel ouvrage qu’ait jamais fait la nature ? Mais à propos, tu l’avois desja veuë une fois, quand tu luy portas ma lettre. Carmelin qui avoit pris Synope pour Charite, avoit esté fort estonné quand il avoit veu la vraye maistresse de son maistre, et avoit reconnu son erreur, tellement qu’il s’en alla dire, vous me pardonnerez s’il vous plaist, mais je n’ay jamais veu celle dont vous me parlez que cette derniere fois. Tu estois donc un menteur, reprit Lysis, quand tu me disois que tu lui avois donné ma lettre, et que tu l’avois
