la fontaine Lucide ; possible que sa nymphe sera si courtoise de se monstrer à nous. Lysis marcha en disant cecy, et estant pres de la source, il apella par plusieurs fois Lucide : mais ne la voyant point paroistre, il dit qu’il faloit avoir patience, et qu’elle estoit possible allé promener quelque part, où bien qu’elle ne se monstroit pas facilement le jour à des hommes. Apres cecy il prit un leger repas avec du pain et des noix, et quand le soleil se fut couché, il s’en retourna chez son hoste avec Carmelin. Ce bon homme qui s’imaginoit qu’il fust sorcier suyvant ce que l’on luy en avoit dit, ne soupa avec luy qu’en crainte : neantmoins il eut bien l’asseurance de luy demander pourquoy luy qui avoit beaucoup d’argent, et sembloit estre de
