Cette page n’a pas encore été corrigée
Ta principale charge est de prendre garde à mes troupeaux au lieu de moy : Carmelin fut fort content de cette dignité, et son maistre ayant dit adieu au berger d’Hircan, et luy aussi, ils chasserent leurs moutons vers un autre endroit, le laissant si estonné de voir ces deux bergers apres un si chetif troupeau, qu’il croioit n’avoir jamais treuvé rien de plus estrange. Apres qu’ils l’eurent quité ils marcherent encore quelque temps, et enfin s’estans assis pres d’une fontaine ils mangerent du pain et beurent de l’eau. Carmelin ne se plaisoit point à cecy, ce n’estoit pas là la vie que son maistre luy avoit fait esperer. Il croyoit qu’il seroit tous les jours de nopce, et cependant l’on le faisoit estre temperant
