Le texte de cette page a été corrigé et est conforme au fac-similé.
Il n'eſt rien de viſible à la clarté du iour
Qui ne ſoit ſenſible à l'Amour ;
Les arbres les plus durs à trauers leur eſcorce
En reſſentent la force.
Il n'eſt point de ſujet aimé parfaictement
Qui n'en ait du reſſentiment ;
Et ceſte ardeur celeſte auec des traicts ſi rares
Charme les plus barbares.
C'eſt cela qui me flatte, & me fait eſperer
Que celle que i'oſe adorer
Ne s'obstinera pas à deffendre ſon ame
D'vne ſi douce flame.
Auant que de ma mort ſes beaux yeux ſoient teſmoins,
Ie luy veux rendre mille ſoins,
Qui meſme au ſentiment des ingrates perſonnes,
Soient du prix des Couronnes.
